Marekani kuwa mwenyeji wa makubaliano kati ya Rwanda na DRC

Waziri wa Mambo ya Nje wa Marekani Marco Rubio atakuwa mwenyeji wa kusainiwa kwa makubaliano kati ya Rwanda na Jamhuri ya Kidemokrasia ya Congo kufuatia ahadi ya kusitisha mapigano, maafisa walisema.

Wizara ya Mambo ya Nje kwenye ratiba yake ya umma ilisema kuwa Rubio atatia saini "tamko la kanuni" na Waziri wa Mambo ya Nje wa DRC Therese Kayikwamba Wagner na Waziri wa Mambo ya Nje wa Rwanda Olivier Nduhungirehe siku ya Ijumaa.

Wizara ya Mambo ya Nje haikutoa maelezo zaidi mara moja.

Katika tangazo ambalo halikuwa linatarajiwa Jumatano, DRC na waasi wa M23, ambao wamepiga hatua za haraka, walisema wamekubali kusitisha mapigano mashariki mwa nchi hiyo wakati wanafanya kazi ya kufikia mapatano ya kudumu.

Maelfu ya watu wameuawa katika mzozo ambao umeendelea kwenye mpaka wa nchi hizo mbili tangu Januari.

Wataalamu wa Umoja wa Mataifa, Marekani na serikali nyingine za Magharibi wanasema kuwa Rwanda inaunga mkono M23, ambayo katika miezi ya hivi karibuni imeteka miji muhimu katika eneo lenye misukosuko lakini lenye rasilimali nyingi mashariki mwa DRC.

Rwanda inakanusha kutoa msaada wa kijeshi kwa M23.

Lakini baada ya ziara mwezi huu, mjumbe wa Marekani-mfanyabiashara Massad Boulos, ambaye ni baba mkwe wa bintiye Rais Donald Trump Tiffany - ametoa wito kwa Rwanda kusitisha uungwaji mkono na kuondoa "wanajeshi wote wa Rwanda katika ardhi ya DRC."

Qatar, ambayo imefanya kazi na Marekani katika masuala mbalimbali ya kidiplomasia, iliongoza mazungumzo kati ya Rwanda na DRC.

DRC imetafuta uungwaji mkono wa Marekani kwa kiasi kwa kujitolea kufikia makubaliano yake na Marekani kuhusu upatikanaji wa madini muhimu.