Marekani imejiondoa kutoka mkataba wa hali ya hewa unaosaidia mataifa yanayoendelea

Marekani imejiondoa katika makubaliano ya hali ya hewa ambapo mataifa tajiri yameahidi mabilioni ya dola kusaidia kundi dogo la nchi zinazoendelea kubadili kutoka kwa makaa ya mawe hadi vyanzo vya nishati ya kijani.

Afrika Kusini ilisema imepokea taarifa kwamba Marekani imejiondoa katika Kundi la Washirika wa Kimataifa IPG, Kundi la nchi tajiri ambazo zimeahidi fedha kwa ajili ya mabadiliko ya nishati nchini Afrika Kusini, Indonesia, Vietnam na Senegal.

Umoja huo unajumuisha Umoja wa Ulaya, U.K., Ujerumani, Ufaransa, Italia, Canada, Japan, Norway na Denmark.

‘‘Marekani ilikuwa imetangaza kujiondoa mara moja kutoka makubaliano ya Afrika Kusini, Indonesia na Vietnam, alisema Chrispin Phiri, msemaji wa Wizara ya Mambo ya Nje ya Afrika Kusini.

Afrika Kusini itapoteza mabilioni ye fedha

Marekani haikuwa imetoa ahadi ya fedha kwa ajili ya mpito wa nishati nchini Senegal, ingawa wanachama wengine wa IPG walifanya hivyo.

Ni hatua nyingine ya Rais Donald Trump kuiondoa Marekani katika mikataba ya hali ya hewa duniani baada ya kutia saini amri ya utendaji mwezi Januari kujiondoa katika mkataba wa kihistoria wa Paris ambao unazileta nchi pamoja kupambana na ongezeko la joto duniani.

Makubaliano hayo yanalenga kupunguza ongezeko la joto duniani kwa muda mrefu hadi nyuzi joto 2.7 Selsiasi (nyuzi 1.5) juu ya viwango vya kabla ya kuanza kwa viwanda au, ikishindikana, kuweka halijoto angalau chini ya nyuzi joto 3.6 (nyuzi 2 Selsiasi) juu ya viwango vya kabla ya kuanza kwa viwanda.

Kujiondoa kwa Marekani kutoka IPG kulimaanisha Afrika Kusini itapoteza zaidi ya dola bilioni 1 katika ahadi za uwekezaji za siku zijazo kutoka kwa Marekani za kusitisha hatua kwa hatua vituo vyake vya uchafuzi wa nishati ya makaa ya mawe ili kupata nishati mbadala, kulingana na taarifa kutoka ofisi ya Rais wa Afrika Kusini Cyril Ramaphosa.

Phiri alisema miradi ya ruzuku nchini Afrika Kusini ambayo ilifadhiliwa hapo awali "na katika hatua za kupanga au utekelezaji imefutwa."