Fiye da mutum 50 sun mutu bayan nutsewar jirgin ruwa a kogi a Congo

Fiye da mutum 50 sun rasa rayukansu kuma da dama sun ɓata bayan da wani jirgin ruwa da ya yi lodin mutane fiye da ƙima ya kife a wani kogi a lardin Equateur na Jamhuriyar Dimokuraɗiyyar Kongo, kamar yadda gidan talabijin na ƙasar ya ruwaito a ranar Alhamis.

Jirgin ruwan yana ɗauke da fasinjoji kusan 100 lokacin da ya nutse a Kogin Kongo daga daren Litinin zuwa Talata, kusa da garin Mayita, wanda ke da nisan kimanin kilomita 40 (mil 24) daga birnin Mbandaka.

“Fiye da mutane 50 sun mutu” shi ne adadin mutanen da aka tabbatar sun mutu a wannan haɗarin, in ji Maitre Kolomba Mampunia, shugaban sashen ƙungiyar agaji ta Red Cross na lardin Equateur, ga gidan talabijin na ƙasa RTNC.

Rufin ya yaye

Jirgin ruwan, wanda ake kira Fortune HB Jado, yana kan hanyarsa zuwa kasuwar Mobenzani a yankin Bomongo daga Mbandaka, lokacin da rufin samansa ya yaye yayin da ake kokarin sauka a tashar jirgin ruwa, kamar yadda rahoton ya bayyana.

Mboyo Loyoko, kwamishinan Kogin Mbandaka, ya danganta wannan mummunan haɗari da rashin bin ƙa’idojin tafiye-tafiye, ciki har da cunkoso da kuma tafiya da daddare.

Bobo Boloko Bolumbu, gwamnan lardin Equateur, ya shaida wa manema labarai cewa ya tura tawagar Red Cross tare da kafa ayyukan jinƙai a wurin wannan mummunan al’amari yayin da ake ci gaba da neman mutane da ba a gano ba.